ⴰⴱⵍⴽⵉⵎ

ⴰⴱⵍⴽⵉⵎ, ⴰⵎⴰⴳⵓⵜ ⵏⵏⵙ ⵉⴳⴰ ⵉⴱⵍⴽⵉⵎⵏ (ⵙ ⵜⵏⴳⵍⵉⵣⵜ: ⴰⵜⵓⵎ, ⵙ ⵜⴰⵄⵔⴰⴱⵜ: الذرّة) ⵜⴳⴰ ⵜⵉⴼⵔⴷⵉⵜ ⵜⴰⴷⴰⵙⵉⵍⴰⵏⵜ ⵏ ⵜⵎⵜⵜⴰ, ⵜⴰⵖⴰⵡⵙⴰ ⵏⵏⴰ ⴰⵖ ⴷ ⵉⵙⵙⵓⵜⵓⵍⵏ ⵀⴰⵜⵉ ⵜⴻⵜⵜⵢⴰⵡⵙⴽⴰⵔ ⵙ ⵉⴱⵍⴽⵉⵎⵏ, ⵜⵓⵔⵔⵓⵜ ⵏⵏⵙ ⴰⵔ ⵜⵊⴳⵓⴳⵓⵍ ⴳⵔ 0,1 ⴰⵔ ,0,5 ⵏⴰⵏⵓⵎⵉⵜⵔ. ⴽⵔⴰ ⵉⴳⴰ ⵜⵜ ⴰⴱⵍⴽⵉⵎ ⵉⴳⴰ ⴰⵔⴰⵡⵙⴰⵏ ⵖ ⵡⴰⴳⴳⵯⴰ ⵏⵏⵙ, ⵍⵍⴰⵏ ⴳⵉⵙ ⵙⵉⵏ ⵉⴼⵔⴷⴰⵙ: ⵢⴰⵏ ⵓⵖⵯⵔⵎⵉ ⵓⵎⵏⵉⴳ ⵉⴱⴹⴰⵏ ⵙ ⵉⴱⵕⵓⵟⵓⵏⵏ ⴷ ⵉⵏⵓⵟⵕⵓⵏⵏ, ⵉⵜⵜⵍⵏ ⵙ ⵡⵉⵍⵉⴽⵟⵕⵓⵏⵏ ⵓⵣⴷⵉⵔⵏ ⴷ ⴰⵔ ⴼⵍⵍⴰⵙ ⵙⴽⴰⵔⵏ ⵎⴰ ⵉⵔⵡⴰⵙⵏ ⵢⴰⵏ ⵓⵎⴷⵍⵓ ⴰⵍⵉⴽⵟⵕⵓⵏⵉ, ⵖⵡⵉⴷ ⴰⵔ ⵜⵜⴷⴷⵓⵏ ⵙ ⵢⴰⵜ ⵜⵉⵢⵎⵎⴰⵔ (ⵣⵣⵔⴱⵜ) ⵓⵔ ⵉⴽⵛⵉⵎⵏ ⵉⵅⴼ, ⴷ ⵜⵉⵢⵎⵎⴰⵔ-ⴰⴷ ⴰⴷ ⵉⵙⵙⴼⵔⵓⵏ ⵎⴰⵅⵅ ⴰⵢⵍⵍⵉⵖ ⴰⵔ ⵉⵜⵜⴳⴳⴰ ⵓⴱⵍⴽⵉⵎ ⵡⴰⵏ (ⵣⵓⵏ ⴷ) ⵢⴰⵜ ⵜⴰⵣⵣⵉⵜ ⵉⵍⵓⵎⵎⴰⵏ.

ⵉⵍⵍⴰ ⵓⴽⴰⵏ ⵎⴰ ⵉⵙⵙⵉⵔⵡⵉⵙⵏ ⴰⴱⵍⴽⵉⵎ ⵙ ⵓⵏⴳⵔⴰⵡ ⴰⵏⴰⴼⵓⴽ ⵉⴳ ⴳⵉⵙ ⵓⵖⵯⵔⵎⵉ ⵜⴰⴼⵓⴽⵜ, ⴳⵏⵏ ⴳⵉⵙ ⵡⵉⵍⵉⴽⵟⵕⵓⵏⵏ ⵉⵎⵜⵉⵡⴳⵏ ⴷⴰ ⴼⵍⵍⴰⵙ ⵜⵜⴱⵉⵔⵉⴳⵏ, ⵎⵇⵇⴰⵔ ⵀⴰⵜⵉ ⵓⵔ ⴽⵓⵍⵍⵓ ⵜⵖⵯⵥⴰⵏ ⵜⴰⵏⵏⴰⵢⵜ-ⴰⴷ, ⴰⵛⴽⵓ ⵙ ⵓⵎⴳⴰⵍ ⵏ ⵉⵎⵜⵉⵡⴳⵏ, ⵉⵍⵉⴽⵟⵕⵓⵏⵏ ⵓⵔ ⴰⵔ ⵜⵜⴹⴰⴼⵕⵏ ⵢⴰⵏ ⵓⵖⴰⵔⴰⵙ ⵉⵏⵎⵏ.

ⴰⴱⵍⴽⵉⵎ ⴰⴽⴽⵯ ⵉⵎⵥⵥⵉⵢⵏ ⴷ ⵡⴰⴷ ⴰⴽⴽⵯ ⵉⴼⵙⵙⵓⵙⵏ ⵉⴳⴰ ⵜ ⵓⵀⵉⴹⵕⵓⵊⵉⵏ, ⴷ ⵓⵖⵯⵔⵎⵉ ⵏⵏⵙ ⵓⵔ ⴳⵉⵙ ⵉⵍⵍⵉ ⴰⵎⵔ ⵢⴰⵏ ⵓⴱⵕⵓⵟⵓⵏ ⴷ ⵃⵜⵜⴰ ⴽⵔⴰ ⵏ ⵓⵏⵓⵟⵕⵓⵏ.

ⵉⵔⴼⵙⴰⵏ ⵉⴽⵉⵎⴰⵡⵉⵢⵏ ⵏ ⴰⴽⴽⵯ ⵉⴱⵍⴽⵉⵎⵏ ⴰⵔ ⵜⵜⴱⴷⴷⴰⴷⵏ ⴼ ⵓⵏⵎⴰⵍⴰ ⴰⵍⵉⴽⵟⵕⵓⵏⵉ ⵏⵏⵙⵏ ⵉⵍⵎⵎⴰ ⴼ ⵡⵓⵟⵟⵓⵏ ⵏ ⵉⴱⵕⵓⵟⵓⵏⵏ ⵍⵍⵉ ⵜⵜⴰⵎⵓⵏⵏ.

ⴰⵔ ⴰⵣⵎⵣ ⴰⴷ ⵜⵜⵢⴰⵡⵙⵙⴰⵏⵏ 118 ⵏ ⵉⴱⵍⴽⵉⵎⵏ ⵏⴰⵃⵢⴰⵏⵉⵏ, ⵏⵎⴰⵍⴰⵏ ⴰⴽⴽⵯ ⵖ ⵢⴰⵜ ⵜⴼⵍⵡⵉⵜ ⴰⵔ ⴰⵙ ⵜⵜⵉⵏⵉⵏ "ⵜⵉⴼⵍⵡⵉⵜ ⵜⴰⵣⵎⵣⴰⵏⵜ ⵏ ⵉⴼⵔⴷⵉⵙⵏ".

ⴰⴱⴷⴰⵔ ⴰⴽⴽⵯ ⴰⵇⴱⵓⵔ ⵏ ⵉⴱⵍⴽⵉⵎⵏ ⴰⵔ ⴷ ⵉⵜⵜⴰⴹⵓ ⵙ ⵢⴰⵏ ⵓⴼⵍⵙⴰⴼ ⴰⵀⵏⴷⴰⵡⵉ ⵉⵙⵎ ⴰⵙ "ⴽⴰⵏⴰⴷ" (600 ⵉⵣⵡⴰⵔⵏ ⵜⵍⴰⵍⵉⵜ), ⵢⵓⵔⴷⴰ ⵉⵙ ⵍⵍⴰⵏ ⴽⵔⴰ ⵏ ⵉⵔⵛⵜⵓⵢⵏ ⵓⵔ ⴰⵔ ⵜⵜⵢⴰⵡⵎⵏⴰⴷⵏ ⵉⵙⵙⴰⵖ ⴰⵙⵏ ⵉⵙⵎ ⵏ "ⴰⵏⵓ", ⵢⵉⵡⵉ ⴷ ⴷⴰⵖ ⵓⴼⵍⵙⴰⴼ ⴰⴳⵔⵉⴽⵉ ⴷⵉⵎⵓⴽⵔⵉⵜ (400 ⵇⴱⵍ ⵜⵍⴰⵍⵉⵜ) ⴰⵡⴰⵍ ⴼ ⵜⵉⵍⵉⵜ ⵏ ⵜⴰⴽⴽⴰ-ⴰⴷ ⵍⵍⵉ ⵎⵉ ⵉⵖⵔⴰ ⵏⵜⵜⴰⵏ ⵙ "ⴰⵟⵓⵎⵓⵚ".

ⵖ ⵜⴰⵙⵓⵜ ⵜⵉⵙ 18, ⵉⵙⴽⵔ ⵓⵎⴰⵙⵙⴰⵏ ⴰⴽⵉⵎⵢⴰⵏ ⴷⵊⵓⵏ ⴹⴰⵍⵜⵓⵏ ⵢⴰⵏ ⵓⵣⵓⵔⵜ ⴷⴰ ⵉⴱⵉⴷⴷⵏ ⴼ ⴽⵔⴰ ⵏ ⵉⵙⴼⴽⴰ ⵉⵙⵉⵔⵉⵎⵏ, ⴰⵣⵓⵔⵜ-ⴰⴷ ⵢⵉⵡⵙ ⴱⴰⵀⵔⴰ ⵖ ⵜⵓⴽⵣⴰ ⵏ ⵉⵔⴼⵙⴰⵏ ⵏ ⵓⴱⵍⴽⵉⵎ.

ⴰⵙⵜⴰⵍ ⵏ ⵓⵖⵯⵔⵎⵉ ⵉⵏⴳⴰⴷⴷⴰ ⵏⵉⵜ ⴷ ⵎⵏⵛⴽ ⴰⴷ ⵉⵥⵥⴰⵢ ⵓⴱⵍⴽⵉⵎ, ⴰⵛⴽⵓ ⵏⵜⵜⴰ ⵉⵙⵙⵓⵔⴼ ⴱⴰⵀⵔⴰ ⵡⵉⵏ ⵡⵉⵍⵉⴽⵟⵕⵓⵏⵏ, ⴰⴷ ⵢⵉⵍⵉ ⵖ ⵓⴳⴰⵢⵢⵓ ⵉⵙ ⴷ ⵢⴰⵏ ⵓⵏⵓⵟⵕⵓⵏ ⵀⵍⵍⵉ ⵉⵏⴳⴰⴷⴷⴰ ⵖ ⵓⵙⵜⴰⵍ ⵏⵏⵙ ⴷ 1839 ⵏ ⵡⵉⵍⵉⴽⵟⵕⵓⵏⵏ.

ⴰⵖⵯⵔⵎⵉ ⵉⵜⵜⵢⴰⵡⵙⴽⴰⵔ ⵙ ⵢⴰⵏ ⵡⵓⵟⵟⵓⵏ ⵏ ⵢⵉⴱⵕⵓⵟⵓⵏⵏ ⴷ ⵢⵉⵏⵓⵟⵕⵓⵏⵏ, ⴽⵔⴰ ⵉⴳⴰ ⵜⵜ ⴰⴱⵕⵓⵟⵓⵏ ⴰⵔ ⴷ ⵉⵜⵜⴰⵙⵉ ⵢⴰⵏ ⵡⴰⴳⴳⵯⴰ ⵓⵎⵏⵉⴳ, ⵉⵎⵉⵍ ⵉⵏⵓⵟⵕⵓⵏⵏ ⴳⴰⵏ ⵉⴷ ⵡⴰⵔ ⴰⴳⴳⵯⴰ (ⵓⵔ ⵛⴰⵔⵊⵉⵏ ⵙ ⵢⴰⵜ). ⵙⵓⵍ ⵀⴰⵜⵉ ⴰⵖⴷ ⵏⵜⵜⵏⵉ ⵙ ⵉⴳⵓⵢⵢⴰ ⵏⵏⵙⵏ ⵜⵜⵢⴰⵡⵙⴽⴰⵔⵏ ⵙ ⴽⵔⴰ ⵏ ⵉⵔⵛⵜⵓⵢⵏ ⵎⵥⵥⵉⵢⵏ ⴰⴽⴽⵯ ⵖⵡⵉⵍⵍⵉ ⵎⵉ ⵜⵜⵉⵏⵉⵏ ⵉⴽⵡⴰⵔⴽⵏ , ⴽⵓⵢⴰⵏ ⵍⵍⴰⵏ ⴳⵉⵙ ⴽⵕⴰⴹ ⵏ ⵉⴽⵡⴰⵔⴽⵏ.

ⵓⵟⵟⵓⵏ ⵏ ⵉⴱⵕⵓⵟⵓⵏⵏ ⴷⴰ ⵉⵜⵜⴰⵎⵓ ⵢⴰⵏ ⵓⵖⵯⵔⵎⵉ ⴰⴱⵍⴽⴰⵎ ⴰⵔ ⵉⴳⵍⵍⵉ ⴰⴼⵔⴷⵉⵙ ⴰⴽⵉⵎⵢⴰⵏ, ⴰⵔ ⵉⵜⵜⴻⵜⵜⵢⴰⵔⴰ ⵙ ⵓⵙⴽⴽⵉⵍ ⵏ ⵣ ⵙⵙⴰⵖⵏ ⴰⵙ ⵉⵙⵎ ⵏ "ⵡⵓⵟⵟⵓⵏ ⴰⴱⵍⴽⴰⵎ".

ⵉⴱⵕⵓⵟⵓⵏⵏ ⴷ ⵉⵏⵓⵟⵕⵓⵏⵏ ⵎⵥⵥⵉⵏ 100.000 ⵏ ⵜⴽⵍⵉⵜ ⴼ ⵓⴱⵍⵖ ⵏ ⵓⴱⵍⴽⵉⵎ.

ⵓⵔ ⴷ ⵣⵓⵏ ⴷ ⵉⴱⵕⵓⵟⵓⵏⵏ ⴷ ⵉⵏⵓⵟⵕⵓⵏⵏ, ⵖⵡⵉⴷ ⵓⵔ ⴷⴰⵔⵙⵏ ⵍⵍⴰⵏ ⵉⴽⵡⴰⵕⴽⵏ , ⴰⴳⴳⵯⴰ ⵓⵎⵏⵉⴳ ⵏ ⵉⴱⵕⵓⵟⵓⵏⵏ ⴰⵔ ⴷ ⵉⵜⵜⴰⵡⴽ ⵙ ⴷⴰⵔⵙ ⴰⴳⴳⵯⴰ ⵓⵣⴷⵉⵔ ⵏ ⵡⵉⵍⵉⴽⵟⵕⵓⵏⵏ ⵖⴰⵢⴰⵏⵏ ⴰⴷ ⵜⵏ ⵉⵙⵖⴰⵎⴰⵏ ⵖ ⵡⴰⴳⵯⵏⵙ ⵏ ⵓⴱⵍⴽⵉⵎ, ⵎⴰⵛⵛ ⵟⵟⴰⴼⵏ ⵡⴰⵅⵅⴰ ⵖⵉⴽ ⴰⵏⵏ ⵢⴰⵜ ⵜⴼⴰⵙⴰ ⴷⴰ ⴰⵙⵏ ⵢⴰⴽⴽⴰⵏ ⵜⴰⵥⵥⵉⴹⵕⴰ ⴰⴷ ⵏⵣⵉⵏ ⴰⵏⵣⴰⵖ ⵏ ⵓⵖⵯⵔⵎⵉ.

ⵓⴽⴰⵏ, ⴽⵔⴰ ⵙ ⴰⵔ ⵜⴻⵜⵜⵎⵖⵓⵔ ⵜⴼⴰⵙⴰ ⵏ ⵡⴰⵍⵉⴽⵟⵕⵓⵏ ⴽⵔⴰ ⵙ ⴰⵔ ⵉⵜⵜⴰⴳⴳⵓⴳ ⵏⵜⵜⴰ ⴼ ⵓⵖⵯⵔⵎⵉ. ⵙ ⵖⵉⴽ ⴰⴷ, ⵉⵍⵉⴽⵟⵕⵓⵏⵏ ⵏⵎⴰⵍⴰⵏ ⵖ ⵜⴼⵔⵉⵔⵉⵏ, ⴷ ⵖⴰⵢⵍⵍⵉ ⵜⵏⵜ ⵉⵙⵏⴰⵃⵢⴰⵏ ⵉⴳⴰ ⵜ ⵎⵏⵛⴽ ⴰ ⵙ ⵎⴳⴰⵍⴰⵏⵜ ⴷ ⵓⵖⵯⵔⵎⵉ, ⵉⵍⵉⴽⵟⵕⵓⵏⵏ ⵍⵍⵉ ⴷⴰⵔ ⵜⵍⵍⴰ ⵢⴰⵜ ⵜⴼⴰⵙⴰ ⵉⴷⵔⵓⵙⵏ ⵍⵍⴰⵏ ⵖ ⵜⴼⵔⵉⵔⵜ ⴷ ⵢⴰⵥⵏ ⵓⴳⴳⴰⵔ ⵉ ⵓⵖⵯⵔⵎⵉ ⴼ ⵖⵡⵉⵍⵍⵉ ⵟⵟⴰⴼⵏⵉⵏ ⵢⴰⵜ ⵜⴼⴰⵙⴰ ⵎⵇⵇⵓⵔⵏ.

ⵜⵉⴼⵔⵉⵔⵜ ⵏⵏⴰ ⵉⵍⵍⴰⵏ ⵉⵣⴷⵉ ⴰⵙ ⵢⴰⵏ ⵉⵙⵎ, ⵅⵜⴰⵍⵍⵉ ⴰⴽⴽⵯ ⵢⴰⴽⵎⵓⵔⵏ ⵉ ⵓⵖⵯⵔⵎⵉ ⵉⵣⴷⵉ ⴰⵙ ⵓⵙⴽⴽⵉⵍ ⵏ "ⴽ", ⵉⵍⵎⵎⴰ "ⵍ" ⴼⴰⴷ ⵙ "ⵎ", "ⵏ", "ⵓ", "ⴱ", ⴷ ⴽⵔⴰ ⵉⴳⴰ ⵜⵜ ⵜⵉⴼⵔⵉⵔⵜ ⵓⵔ ⴰⵔ ⵜⵜⴰⵎⵓ ⴰⵎⵔ ⵢⴰⵏ ⵡⵓⵟⵟⵓⵏ ⵉⵜⵜⵢⴰⵡⴳⵍⴰⵢⵏ ⵏ ⵡⵉⵍⵉⴽⵟⵕⵓⵏⵏ, ⵙ ⵓⵎⴷⵢⴰ, ⵜⵉⴼⵔⵉⵔⵜ ⵉⵣⵡⴰⵔⵏ ⴽ ⵓⵔ ⵜⵓⴼⵉ ⴰⴷ ⵜⴰⵎⵓ ⵓⴳⴳⴰⵔ ⵏ ⵙⵉⵏ ⵡⵉⵍⵉⴽⵟⵕⵓⵏⵏ. ⵜⵉⴼⵔⵉⵔⵜ ⵜⵉⵙ ⵙⵏⴰⵜ ⵍ ⵉⵍⵍⴰ ⴷⴰⵔⵙ ⴰⴷ ⵜⴰⵎⵓ ⵜⴰⵎ, ⵜⵉⵙ ⴽⵕⴰⴹⵜ ⵎ ⴰⵔ ⵜⴻⵜⵜⴰⵎⵓ 18, ⵉⵎⴽ ⴷ ⵉⵎⴽ..

ⵜⴰⵏⴳⴰ: Matière.

ⵜⵉⵔⴷⵉⵜ ⵜⴰⴷⴰⵙⵉⵍⴰⵏⵜ: Élement basique.

ⵜⴰⵣⵣⵉⵜ ⵉⵍⵓⵎⵎⴰⵏ: corps solide.

ⵉⵔⴼⵙⴰⵏ ⵉⴽⵉⵎⴰⵡⵉⵢⵏ: propriétés chimiques