Barsaluna

Barsaluna tga yat tmdint ɣ tsga tafasit tagmuḍant n Spanya. Nttat ad igan tamaẓunt d tmdint tamqqrant n tmnaḍt timḍfarut n Katalunya, ula tga tamdint tis snat s midden ɣ Spanya. S 1.6 id mlyun n imzdaɣn ɣ ugzzum nns,[8] tama nns tamdint tɣama ar tmnaḍin yaḍnin ɣ tmazirt n Barcelona, tga aɣrf i 5.8 id mlyun n midden,[3] aynna tt iggan d tama tamdint tis smmust s midden ɣ Tdukli Turubit dffir Paris, tama n Ruhr, Madrid d Milan.[3] Tga yat zɣ tmnaḍin timqqranin f yill Agrakal, tlla f ugama gr imawn n iɣzran n Llobregat d Besòs, tettwaṭṭaf sɣ tsga n tgmma s idrarn n Serra de Collserola.

Tettuskr zun d tamdint tarumit, ɣ talliwin n lqrun lwsṭa Barcelona tucka ad tg tamaẓunt n Lkumṭa n Barcelona. Dffir mad tmunn d Tgldit n Aragon ad tg amuni n Tajllit n Aragon, Barcelona, da sul igan tamaẓunt n Tmnkda n Katalunya, tucka ad tg tamdint tamqqrant ɣ Tajllit n Aragon d agzzum amqqran asdrfan d undblan n Tajllit, ar d tt tuẓẓl Valencia, da ittyamẓn sɣ ifassn n Imurawn s ifassn n Ikatalann, imikk dat n tmunt n tgldit gr Tajllit n Castilla d Tajllit n Aragon ɣ 1492. Barcelona tucka ad tg agzzum amqqran n ubḍḍu n Ikatalann, tga tamurt n Fransa i kra n tizi ɣ tasut tis 17 ɣ Imnɣi n Imgrawn d daɣ ɣ 1812 ar 1814 ddaw unbaḍ n Napoleon. Tga tamaẓunt n Katalunya Tamsgdalant ɣ Tasgdalt Tasbanyulit n 1936, d aɣiwan n tnbaḍt n Tagduda Tasbanyulit tis snat ɣ Imnɣi Agdudmmas n Spanya, ar d tettwaṭṭaf s ifassn n ifacistn ɣ 1939. Dffir n usmatti asbanyuli s tagduda ɣ isggʷasn n 1970, Barcelona tucka daɣ ad tg tamaẓunt n yat Katalunya timḍfarut.

Barcelona tla yat tmagit tadlsant iɣudan, tga ass ad yan ugzzum amqqran adlsan d yan wansa imqqurn i imssutln. Ar bahra ttyawssan s twuriwin tiɣawsanin n Antoni Gaudí d Lluís Domènech i Montaner, da igan inmudag n tdlsant n umaḍal n UNESCO. Tamdint tga aɣrf i sin zɣ tsdawiyin ifulkin ɣ Spanya: Tasdawit n Barcelona d Tasdawit n Pompeu Fabra. Iɣrfawn n Tdukli n Ugrakal llan ɣ Barcelona. Tamdint ttyawssan s uskr n Wurarn n Unɣul n 1992 ula d timsawalin d tikccamin n umaḍal. S umdya, gis tettunḍam kigan n imyagarn igmaḍanin n umaḍal.

Ism n *Barcelona* yucka d sɣ wawal aqbur ahibiri *Baŕkeno*, da ittyafan ɣ yan watig aqbur n uqarid f tsga tafasit n uqarid s tira tahibirit s ,[15] ɣ isagmn iqburn igrikin s Βαρκινών, *Barkinṓn*;[16][17] d s talatinit s *Barcino*,[18] *Barcilonum*[19] d *Barcenona*.[20][21][22]

Kra n isagmn iqburn ar ttinin is tmdint ttyawsma s ism n umɣar aqrṭaji Hamilcar Barca, da ittyannan is t ntta ad tt iskrn ɣ tasut tis 3 dat n tlalit,[23] macc ur illi kra n tnqqiḍt tssanan is Barcelona tga kra n uɣrm aqrṭaji, nɣd is ism nns aqbur, *Barcino*, ila kra n ufars d tawja n Barca n Hamilcar.[24] Ɣ talliwin n lqrun lwsṭa, tamdint tga s ism *Barchinona*, *Barçalona*, *Barchelonaa*, d *Barchenona*.